این پست به زبان خوانساریست
خبدین؟کم پیداگنایدین.
امگوا این چند روئه دوبوره بوران خوسار که نگنا.یه دوس خونوادگی دارمین که کردنده.بعد دوسال بومنده کیه مون.ویدرازشمانبنده خیلی مردمون خبینده.بامیرم زیاد بحث نکرنده ولی وقت گیراترنده بامن راجع به شیعه وسنی بحث کرنده.اژونوات چونو مین دین شما واجبو به خلیفا توهین کردین.اموات ایزن چی نی .هاماداژمین ائمه معصیمنده ولی خلفا نه.به خاطرتعصبژون ری خلیفه دیم ابی ویشترم ازژ چی نوات ولی راجع به شیعه م بنگارت واموات دین هاما اصولژ رافتو بخششو دوروننگاردنو مهمترازهمه چی خداو.اموات مین این دنیا باید خبی بکره دل همه شادکره کینه نداربه .
خانمژ اژوات شما با شیعه فرق داردین.اموات نه هرچی داژان مال شیعه و.درضمن شهرمون جی بزرگترین عالماژ دارت ودرو.هاما معتقدمین که باید شخص عصمت وطهارت دربو اون وقت جانشین پیغمبر گنو واسه همین حضرت علی اولی به.
سوالژون کرت:اهل بیت که شماتعریف کردین مگه زن آدم غریبه و که فقط شامل وچا پیغمبرگنو.
جوابم هادا:اونی که هاما داژمین اهل بیت عصمت وطهارتو .اهل بیت همه خونوادد گننده ولی اون قسمتیژ که عصمت وطهارتو شامل پنج تن گنو
سوالژون کرت:چونومهربیندین شرکو؟
اموات:هاما مهربیننمین ریبریمون که بژ سجده کرمین .اگه یک چی ریبریت بو سجده کره شرکو ولی مهر بینمین ری زمین سرمون بینمین ریژ فقط به مهره نگادکرمین وفکرکرمین هرآن ممکنو سرمون بیگنو به سنگ الحد تا یه تکونی بخورمین وگناه نکرمین درضمن سجده کرتن ری قالی حرومو ومهرباعث گنو حواسمون جمع گنو
یاقادون خالی مث خومم بوات ابی اگه ویشتر واپرسنده ازکا یه مجتهدی جور کران
بلا سرم بنومه اژونوات چطیری زنده بودن امام زمان ثابت کردین.
همین جوریم بوات هاما باید اول ری امامت به توافق برسمین تابعد بگنو راجع به امام زمان بحث کرمین
دوبوره اژونوات معجزه مال پیغمبرو چطیری یه امام بامعجزه این همه عمره کرو
اموات اصحاب کهف که پیغمبر نیدنده ولی مین قر؟آن هو که معجزه شامل حالژون گنا سیصدسال درخفتنده
خدارحمژکرت بحث عوض گنا نجاتم پیداکرت
